Өктөм нэһилиэгэр муус устар 15 күнүгэр биир кэрэхсэбиллээх тэрээһин олохтоох дьаһалта дьиэтигэр буолла. Ол курдук, 50 сыл бииргэ дьоллоохтук олорон кэлбит, киэн туттар ыалбытын Валентина Петровна уонна Антон Антонович Ноговицыннары «кыһыл көмүс» сыбаайбаларынан эҕэрдэлии муһуннубут.
Валентина, Антон Ноговицыннар 1976 сыллаахха cүрэхтэринэн сөбүлэһэн, харахтарынан хайҕаһан, санааларын сахалыы салайынан, бэйэ-бэйэлэрин ситэрсэн биэрэргэ мэктиэ тылларын этинэн саҥа ыал аатын сүкпүттэрэ. Дьиэ кэргэн баһылыга Антон Антонович идэтинэн агроном-луговод, өр сылларга «Өктөм» совхозка бурдук үүннэриинэн утумнаахтык дьарыктанан элбэх грамоталарынан, “Үлэҕэ килбиэнин иһин” 3 ст. орденынан наҕараадаламмыта.
Валентина Петровна 1971 сыллаахха эдэр учуутал кыыс Өктөм орто оскуолатыгар математика учууталынан үлэтин саҕалаабыта. Валентина Петровна үлэ бэтэрээнэ, Российскай Федерация үөрэҕириитин туйгуна, Саха Өрөспүүбүлүкэтин үтүөлээх учуутала, «Гражданскай килбиэн» бэлиэ туһааннааҕа, учууталлар учууталлара, “Хаҥалас улууһун үөрэҕириитин сайдыытыгар кылаатын иһин”, «Хаҥалас улууһун социальнай-экономическэй сайдыытыгар кылаатын иһин бэлиэлэр хаһаайката, Өктөм нэһилиэгин уонна Хаҥалас улууһун бочуоттаах олохтооҕо. Валентина Петровна улуус үөрэҕириитин музейыгар дириэктэринэн үлэлии-хамсыы сылдьар. Бу музейы Валентина Петровна барытын бэйэтэ сүүрэн-көтөн, кэпсэтэн, туруорсан арыйтаран, күн бүгүн улууспут биир илиигэ баттанар музейа буолла.
Ноговицыннар үс оҕолонон, элбэх сиэннэнэн нэһилиэк сис ыала, киэн туттар дьоһун дьоммут буолаллар. Бу күн кыһыл көмүс сыбаайбалаах дьоммут Хаҥалас улууһун убаастабыллаах ыалларын бочуоттаах кинигэлэригэр ааттара киирэн үөрүүбүт үрдээтэ. Кинилэри истиҥ тылынан нэһилиэк аҕа баһылыга Александр Николаевич Большаков, Өктөмнөөҕү үөрэх-билии кыһатын коллективын идэлээх сойууһун бэрэссэдээтэлэ Ольга Мартовна Слепцова, дьаһалта специалиһа Людмила Анатольевна Алексеева эҕэрдэлээтилэр.
Кыһыл көмүс ыалларбытыгар Валентина Петровна уонна Антон Антонович Ноговицыннарга алмаас таас курдук кытаанах доруобуйаны, уһун үйэни, дьолу-соргуну баҕарабыт!
