Саха Өрөспүүбүлүкэтин бастакы Президенэ Михаил Ефимович Николаев төрөөбүт күнүгэр дойдутугар Өктөмҥө истиҥ көрсүһүү буолан ааста. Бастакы Президиэн архыып-библиотекатыгар Николаев кииҥҥэ сарсыардаттан «Мин күндү киһим» кинигэ уонна хартыыналар быыстапкалара, ЯАССР физическай култуураҕа уонна спортка үтүөлээх үлэһитэ, «Спорт албан аата” музей дириэктэрэ Михаил Егорович Друзьяновы кытта көрсүһүү буолла. Бу көрсүһүүгэ М.Е.Николаев аатынан Өктөмнөөҕү үөрэх-билим киинин үөрэнээччилэрэ, Дьокуускай куорат М.Е.Николаев аатынан саҥа тутуллубут оскуола коллектива, олохтоохтор сырыттылар.
Эбиэт кэннэ мустубут ыалдьыттары, олохтоохтору эҕэрдэлээн Чапаев сэлиэнньэтин «Дьиэрэй» бэтэрээннэр хуордара ыллаата. Дьокууйскай куорат «Арчы дьиэтин» иһинэн үлэлиир «Чараҥ» дьахталлар ансаамбыллара (салайааччы Петрова Лидия Васильевна, ырыаҕа уһуйааччы Иванов Валерий Герасимович), “Өрөгөй” эр дьон ансаамбыллара (салайааччы Варламов Иннокентий Иннокентьевич, ырыаҕа уһуйааччы Иванов Валерий Герасимович) тэринэн кэлэн «Ытык сиргэ ырыа кэһиилээх» диэн бэрт сэргэх кэнсиэри бэлэхтээтилэр. Куораттан кэлбит ыалдьыттарбыт талааннарын олус сөхтүбүт, ытыспыт тыаһынан биһириирбитин биллэрдибит. Ыалдьыттарбыт бииртэн биир нарын сахалыы ырыалара дууһабытын долгутта, истиҥ иэйиини бэлэхтээтэ.
Кэнсиэр кэнниттэн Никита Аржаков “Путь Президента” диэн документальнай киинэтин олус астына, дуоһуйа көрдүбүт. Хайдах курдук улуу киһи норуотун туһугар туруулаһан үлэлээбитин, инникини өтө көрөн хорсуннук дьаһаммытын сыллар аастахтарын аайы өссө дириҥник өйдүөхпүт, сөҕүөхпүт турдаҕа!
Федора Фомина
