Сэтинньи 10 күнүгэр П.И.Шадрин аатынан Өктөм орто оскуолатын 7 “а” кылааһын оҕолоругар (кылаас салайааччыта Габышева Любовь Николаевна) “Чөл олох – олох төрдө”диэн кылаас чааһын А.С.Данилова аатынан «Барҕарыы» култуура киинин үлэһиттэрэ ыыттылар. Оҕолор бу кылаас чааһыгар чөл олох, чөл олохтоох диэн кими этиэххэ, чөл олохтоох буоларга туохха болҕомтону ууруохха сөбүй диэн боппуруостарга толору эппиэти ыллылар. Кулууп үлэһиттэрэ оҕолорго тиийимтиэ тылынан кэпсээн, холобурдаан көрдөрбүттэрэ кэрэхсэбиллээх буолла.
Оҕо чөл буоларыгар элбэх хайысхалары тутуһуон сөбүн эттилэр. Холобур, күннээҕи режимы тутуһуу, сөпкө сибиэһэй аһы аһааһын, спордунан дьарыктаныы, дьиэҕэ араас үлэҕэ көмөлөһүү, оскуолаҕа кэлэргэ сатыы хаамыы, куһаҕан тыллары туттубат буолуу, куһаҕан дьаллыктартан туора туруу, тулалыыр дьоҥҥо көмөлөһүү, ыраас ыра санааланыы.
Чөл олоҕу тылынан эрэ тутуһуҥ диэбэккэ, Федора Ивановна бэйэтин хайдах чэбдигирдэрин туһунан кэпсээбитин оҕолор олус сэҥээрдилэр уонна успуордунан дьарыгы скакалкаттан саҕалыаххайын диэн ыҥырыытын өйөөтүлэр. Онон, үс скакалканан бэлэмнэнии саҕаланна. Кыратык бэлэмнэнэ түһээт скакалканан күрэхтэһии саҕаланна. Скакалкаҕа саамай элбэҕи ыстаммыт Наумов Дима, Иванов Богдан, Габышева Дияна, Стрекаловскай Тимур минньигэһинэн бэлиэтэннилэр. Ол кэнниттэн аны балыксыттар күрэхтэрэ буолла. Манна Хадан Арчын тэҥнээҕин булбата.
Кылаас салайааччыта Любовь Николаевна: «Бүгүн чөл олоххо анаммыт кылаас чааспыт олус таһаарыылаахтык ааста. Оҕолор чөл олох кистэлэҥнэрин истэн баран, аны тута сөрөөн успуорка бастакы хардыы курдук скакалкаттан саҕалаатылар. Федора Ивановна кэпсээн, өссө скакалкаҕа бэйэтэ ыстанан көрдөрбүтүн олус сөхтүлэр. Кини ыстаммыт кирбиитигэр ким да тиийбэтэ гынан баран, салгыы дьарыктанарга сорудах ылан, өссө дьарыктаныахтара дии саныыбын. Онон, маннык кэрэхсэбиллээх, оҕолорго туһалаах кылаас чааһын ыыппыт култуура үлэһиттэригэр махтанабын».
Оҕолор дьиэлэригэр скакалка атыылаһан дьарыктанарга сорудах ыллылар уонна тохсунньу ыйга Фоминнар дьиэ кэргэн ыытар скакалка күрэҕэр кыттарга бэлэмнэрин биллэрдилэр.
Федора Фомина
