Гран при — Лугинов Борис Степанович- Борис Борогонский Усть -Алданский улус
Лауреат 1 степени — Петрова Розалия Константиновна, Дьокуускай
Лауреат 2 степени — Дьааҥы Кыыһа Сыралы Дьэбдьиэй Сиэнэ, Верхоянский улус
Лауреат 3 степени — Парников Василий Степанович, Усть-Алданский улус
Дипломант 1 степени — Уран Күннэй Саргын Кыыһа, Намский улус
Дипломант 2 степени — Сергеева Наталья Егоровна Егоровна-Аана Кыыһа, Чурапчы
Дипломант 3 степени — Бурцев Владимир Гаврильевич-Мэйик Болуодьа, Ленский улус
Дипломанты
- Дьячковская Вика-7 «а» кл. ПСШ им. В.Н. Оконешниковой рук. Копылова О.И.
- Неустроева Марианна Ариановна -МАрыйаана- Амгинский улус
- Евсеева Аксинья Афанасьевна — Өксөйөрдөөх Өксүү- Абыйский улус
- Москвитина Маргарита Герасимовна, Мегино-Кангаласский улус
- Васильева Наталья Тимофеевна-Алдаана, Тулагино
- Сыроватская Татьяна Дмитриевна, Якутск
- Уваров Александр Михайлович — Сата Уола, Хангаласский улус
- Санникова Зоя Лукинична -Үчүгэй, Якутск
- Старостина Любовь Николаевна- Чөрүмчээнэ, Верхоянский улус
- Лиханов Анатолий Егорович, Хангаласский улус
- Скрябина Зоя Николаевна, Мегино-Кангаласский улус
- Петрова Татьяна Николаевна-Айтыына, Эвено-Бытантайский улус
- Гаврильева Людмила Михайловна — Намчы, Верхневилюйский улус
- Евсеева Каджана Николаевна — Чэлгийэ, Сунтарский улус
- Егорова Маргарита Егоровна, Нюрбинский улус
- Андреева Светлана Николаевна — Маайа Сиэнэ, Якутск
Үүнэр дьыл бэлиэтэ ХАРЫЙА
Холумтан сылааһын бэлиэтэ
Хоточчу астаах остуолугар,
Хонон турдах ахсын чугаһыыр
Хаар кыһын киэргэлэ *ХАРЫЙА!*
Саҥа холбоһор кыыстаах уолга,
Саҥа ыал олоҕун түстүөҕэ,
Саҥа дьолунан сандаарыаҕа
Саҥа Дьылы көрсөр *ХАРЫЙА!*
Арыйыахтын сүрэх күлүүһүн,
Амтаннаах кыынньар утаҕынан,
Алгыс тыла минньигэһинэн,
Аптаах дьыл туоһута *ХАРЫЙА!*
Таптал кууһуохтун эдэр дьону,
Таптаһар иккиэйэх сүрэҕи,
Таптал иэйиитин бэлэхтээтин
Тырымнас уотунан *ХАРЫЙА!*
Сулустаах халлаан ыллыгынан,
Суолларын омоонун буллара,
Сирдээҕи дьоллорун аартыгын
Суһумнатыа уоттаах *ХАРЫЙА!*
Үрүмэччи лыаҕа кыһыл ат
Үтүмэн үөрүүтүн тобулар,
Үгүс үктэлэ буола тур, ЭН,
Үүнэр дьыл бэлиэтэ *ХАРЫЙА!*
Лугинов Борис Степанович, Борис Борогонскай Уус-Алдан, Бороҕон
Саҥа дьыл дьоллоох түгэнэ
Алмаас таас кэриэтэ күлүмнүүр кыырпахтаах,
Дьэргэлгэн уоттардаах дьүкээбил үҥкүүлээх,
Будулҕан туманнаах, оһуордаах кырыалаах
Саҥа дьыл киэһэтэ үүннэ дии биһиэхэ.
Ким күүппэт буолуоҕай бу дьоллоох түгэни-
Эһээ Дьыл сыарҕанан айаннаан кэлиитин,
Хаарчаана сиэн кыыспыт нап-нарын үҥкүүтүн,
Киэргэммит харыйа дьиримниир уоттарын.
Ким күүппэт буолуоҕай бу дьикти түгэни-
Алыптаах кэһиилээх үөрүүлээх киэһэни.
Оҕолуун-уруулуун долгуйа түмсүүтүн,
Харыйа анныгар кистэлэҥ бэлэҕин.
Ким күүппэт буолуоҕай соһуччу түгэни-
Тапталга билинэр сипсийэр иэйиини.
Сирдээҕи баҕабыт томточчу туолуутун,
Оҕолуу санаанан алыпка киириитин.
Ким күүппэт буолуоҕай бу кэрэ түгэни-
Эгэлгэ минньигэс астарбыт күндүтүн.
Табачаан үҥкүүнү, Үрүҥ хаар ырыаны
Ис куттан арылла кутуллар дорҕоонун.
Бу буолар Саҥа Дьыл үөрүүлээх түгэнэ-
Саҥа сыл саҥалыы салаллар саргыта.
Хотугу сулуспут суһумнуур сырдыгар
Дьолунан сыдьаайар, уйдарар киэһэтэ.
Розалия Петрова, Дьокуускай
САҤА ДЬЫЛ КИЭҺЭТЭ
Харыйа уон араас өҥүнэн дьиримниир,
Ырыаҕа уйдаран тырымныы нусхаҥныыр,
Хас биирдии лабаата сэгэйэ күөгэҥниир,
Киэргэнэн биир тэҥҥэ үҥкүүлээн нуоҕаҥныыр.
Хаарчаана көр-нарга, оонньууга ыҥырар,
Хоробуот ырыата дьиэрэйэ угуйар,
Манна баар эгэлгэ куобахчаан, саһылчаан,
Бухатыыр, сур бөрө, муус-маҥан туллукчаан.
Дед Моруос алгыһа сүргэни көтөҕөр,
Инники олоҕу аамчылыы сэгэтэр,
Эриэккэс кэһиитин арчылаан түҥэтэр,
Кыракый киһичээн үөрүүтэ мичээрэр.
Саҥа Дьыл дьолунан ыспахтыы күлүмнүүр,
Умайар уот кыһыл сулуһа суһумнуур,
Саҥа Сыл кэмигэр үктэнэн далбаатыыр,
Кэскили түстэһэн инники хардыылыыр.
Дьэбдьиэй Сиэнэ
Дьааҥы
13.12.2025.
Саҥа дьыл үөрүүтэ_*
Кыыдааннаах кыһын аптаах алыба,
Кырыа тымныы уоскутар абылаҥа,
Айаннатан тиийэн кэллиҥ биһиэхэҕэ,
Аартыкпытын арыйдыҥ быйылгы түһүлгэҕэ.
Оҕо саас сырдык ньээкэ уйата,
Остуоруйа дьиктилээхэй баай дойдута-
Оҕо-аймах бүттүүн күүтэр уйгута,
Ол онтон дуоһуйар, манньыйар үс кута.
Харыйабыт тырымнас уота умайар,
Хаар кыырпахтарынан ымсыырда угуйар,
Хатыламмат түгэнэ силлиэни үтэйэр,
Харахпытыгар үөрүү кустугун үксэтэр.
Сайдыы, үүнүү ыллыктаах суолунан,
Сахабыт сирин киэҥ, улуу дуолунан
Саҥа дьылбыт, саҥа дьолбут салалыннын,
Саха омук сарсыҥҥыта саргыланнын!
Барыбыт баҕа санаата, ырата
Барҕара туоллун, оҕуруолуу тиһилиннин,
Олох кэрэтин түстүүр ыллам ырыа
Олоҥхолуу куйаар устун иһилиннин!
_*Саргын кыыһа Күннэй*_
Саргылаах Саҥа Дьыл
Дьон-сэргэ дьоллорун барҕарда,
Долгураҥ иэйиинэн угуттуу,
Саргылаах Саҥа Дьыл киэһэтэ
Сандаара салаллан кэллэҕэ.
Дьүкээбил суһумун түһэрэн,
Күлүмнэс уотунан
тырымныы,
Лаглайа киэргэммит харыйа-
Сиэдэрэй симэҕэ ситтэҕэ.
Маскараат, Дед Моруос, Хаарчаана,
Эгэлгэ дьэрэкээн оонньуурдар,
Эриэккэс ырыалар, хоһооннор,
Эһээ Дьыл күүтүүлээх бэлэҕэ…
Саҥа Дьыл алыптаах киэһэтэ,
Саҥа Дьол суһумнуур сыдьаайа,
Саҥа Сыл күүтүүлээх түгэнэ-
Абылаҥ иэйиинэн куустаҕа.
Саҥа Дьыл алыптаах түүнүгэр
Тырымныы умайар сулустар,
Кэрэни, дьиктини ыралаан,
Кистэлэҥ иэйиини саҕаллар.
Саҥа Дьыл дьиктилээх түүнүгэр
Саргылаах санааны соргулаан,
Сиппэтэх санаалар ситэллэр!
Туолбатах ыралар туолаллар!
Аана Кыыһа
Оҕо сааспыт Саҥа Дьыла
Ахсынньы ыйбыт бутуутэ
Саҥа Дьыл киэһээтин
Билии-үөрэх оскуолата
бастакы кылаас үөрэнээччитин.
Ырыа, хоробуот хаамыыта
Мааска остуоруйа эйгэтин
Дьоллоох түгэн буолбута
Моруос оҕонньор киирбитин.
Толору куул сүгэһэрэ
Кумааҕыга сууламмыт кэһиитин
Хаарчаана оҕоҕо түҥэттэ
Баһыыыба тылларын ылбытын.
Оҕо-аймах үөрөөтэ
Сууламмыт бэлэҕи арыйбытын
Кыһыл дьаабылыка угуллубута
Амтана, сыта умнуллубатын.
Кэмпиэт, бичиэнньэ арааһа
Күнду минньигэс бастыҥын
Саҥа Дьыл харыйата
Оҕо сааспын санаппытын.
Владимир Бурцев-Буолуодьа Мээйик Ленский улус
Саргылаах Саҥа Дьыл
Саргылаах Саҥа дьыл
Салаллан кэллэ дии.
Үөрөөбөт көтүүбүт
Үрдээтэ, доҕоттоор!
Саҥа дьыл, эйиигин
Айхаллаан ыллыбыт!
Саҥа дьол ырыалаах
Уруйдаан туойабыт!
Чээлэй күөх харыйа
Киэркэйэ симэннэ,
Дьэрэкээн уоттара
Дьиримнии умайда.
Оо, тымныы оҕонньор
Кэһиитэ элбэҕин.
Хаарчаана барахсан
Үҥкүүтэ кэрэтиэн.
Маскарад арааһа
Сиэттиһэн киирдилэр,
Таабырын буоланнар
Талбаара хаамтылар.
Үҥкүүлээ, эргичий,
Өрөгөй киэһээҕэ!
Дуоһуйа, астына
Дуораччы ыллыахха!
Василий Парников
Усть-Алданский улус