БАРГАРЫЫ

Гран-При: Поскачина Мария Еремеевна
Якутск

Лауреат 1 степени: Дьячковская Екатерина Дмитриевна-Талаана Чурапчинский улус.

Лауреат ll степени: Жиркова Александра Николаевна -Дьүөрэл
Усть — Алданский улус

Лауреат 3 степени: Руфова (Педюрканова) Евдокия Васильевна
Якутск

Дипломант 1 степени: Нератова Елена Петровна-Суралдьыма
Намский улус

Дипломант 2 степени: Гуляева Александра Васильевна
Среднеколымский улус.

Дипломант 3 степени: Андреева Светлана Николаевна-Маайа Сиэнэ
Якутск

ДИПЛОМАНТЫ:

1.Сорошева Лария Ивановна
Таттинский улус.
2.Старостин Александр Алексеевич
Верхоянский улус
3.Кондаков Иван Иванович-Тимирхан
Вилюйский улус.
4.Кылабысова Мария Филипповна
Мегино-Кангаласский улус.
5. Саввина Валентина Саввична-Оһуордаах
г. Якутск
6.Еремеев Василий Васильевич-Василь
Сунтарский улус
7.Сыроватская Татьяна Дмитриевна
Якутск
8.Иванова Таисия Ивановна
Нюрба-Якутск
9.Трофимова Наталья Александровна
Хангаласский улус.
10.Иванова Марина Титовна-Дьэргэстэй
Якутск.
11.Винокурова Мария Ивановна-Уйгулаах
Усть-Алданский улус
12.Старостина Зоя Ильинична-Кичэкэ
Верхневилюйский улус.
13.Захаров Дмитрий Дмитриевич-Хараҥаччы
Мегино — Кангаласский улус.
14.Михайлова Дария Дмитриевна
Чурапчинский улус.
15.Иванова Евдокия Георгиевна-Дьэбдьиэй
Верхневилюйский улус.
16.Гаврильев Николай Яковлевич-Ньуорда Ньукулай
Якутск

Сэргэ курус сэһэнэ

Мин кэллим эйиэхэ, тапталлаах дойдубар,
Кыайыы ыһыаҕын ытык күнүгэр.
Өбүгэм таҥаһын маанытык таҥнаммын,
Сахалыы сиэринэн сэмэйдик туттаммын.

Үөрүүгэ кыттыһан дьоллонон ааһаары,
Алгыстаах сэргэҕэ салама баайаары.
Кырылыы кыынньыбыт биэ үүтэ кымыһы
Сахалыы чороонтон омурдан ылаары.

Киириигэ киэргэнэн сэргэлэр турбуттар
Кынтайан-кылбайан кэрэ кыыс курдуктар.
Күн уотун иҥэрэн, көмүстүү күлбүттэр,
Хас биирдии ыалдьыты уруйдуу туойбуттар.

Ойуччу самнайан аар сэргэ турара,
Тулалыыр үөрүүгэ кыттыспат курдуга.
Өр күүтэн сылайбыт, эрэлин сүтэрбит,
Санааҕа баттаппыт кырдьаҕас курдуга.

Туохтан мунчаардыҥ, эн кэпсээ, Аар сэргэ,
Үөрүүлээх күн эбээт, бу бүгүн бар дьоҥҥор.
Алгыстаах салама баайыллан сандаарда,
Чорооҥҥо кырылыыр кымыспыт оргуйда.

Онуоха эппитэ аар сэргэ оргууйдук-
Сүрэхпэр курдары тиийэрдик, курустук,
Үс куппун кутурҕан санааҕа куустаран
Көмүскэм уутун иэдэспэр сүүрдэн.

Оҕолоор, эһиги эдэрдэр, умнумаҥ,
Хайдахтаах үлүгэр сүтүгү сүктэрэн,
Уот сэрии иэдээнэ бу сиргэ бүппүтүн,
Хара дьай санаата имири сүппүтүн.

Эһиги мин курдук дьылҕаны көрсүмэҥ,
Эдэркээн киһи сэрииттэн төннүбэт ыйааҕынан,
Уот сэрии хонуутугар хааларын биттэнэн,
Эргиллибэт айаныгар атаарары, билимэҥ.

Билимэҥ эһиги, оҕону сүтэрбит ийэлэр
Кэрэгэй дьылҕаларыттан кэлэйиилэрин,
Бар дьонтон кистээннэр сэргэҕэ кэлэннэр,
Сулана ытааннар көҕүстэрин кэҥэтэллэрин.

Тапталлаах оҕом эргиллиэ, диэн, эрэнэн
Кыһыҥҥы томороон тымныы күннэргэ,
Сайыҥы өҥүрүк куйаастааах кэмнэргэ,
Ырааҕы одуулуу иһийэн туралларын.

Аҕыс уон сыл ааста, ол Кыайыы күнүттэн,
Ытабыл булкаастаах өрөгөй түгэнтэн.
Сүтүктээх ийэлэр бу сиртэн бардылар,
Кэтэһии кэриэһин санныбар сүктэрэн…

…Хараастан турбутум аар сэргэ аттыгар,
Сэргэ курус кэпсээниттэн бөтө бэрдэрэн,
Ол эрэн алааспар төннөр түгэннэрбэр,
Киһини кэтэһэр күүс баарыгар эрэнэн.

Ол иһин этэбин эһиэхэ- эдэрдэр,
Ытык сэргэлэр дьылҕалаах эбиттэр,
Эйэлээх олоҕу харыстааҥ дуу, диэннэр,
Сахалыы үс кукка алгыһы этэллэр.
Мария Поскачина

☀️🙏🧚🏻🕊️Талаана

Самныбатын сахам санаата

Хайдахтаах даҕаны түгэҥҥэр
Күн айыы санаабыт сүппэтин,
Хайдахтаах даҕаны түгэҥҥэр
Кэскили чолбонум сирдээтин.

Оннооҕор буолуохтан орпутуҥ
Өркөннөөх төрүппүт барахсан,
Охсуулаах киирсиини уйбутун
Өстөөххүн өргөстүү утаарсан.

Төһөлөөх ыардарын туоратан
Тулуурдаах аартыгы астаҕыҥ,
Тохтообот уордарын хайытан
Тимирдэн солоҕу кыайдаҕыҥ.

Мин дьоҕус омугум эрдээхтик
Арбайдыыр батталын ыстаҕа,
Мин дьоһун омугум хорсуннук
Адьарай киэптиирин үүрдэҕэ.

Үрүҥ Аар Тойонум уураахтаан
Эстибэт ыйааххын ыллахпыт,
Үрдүкү арчытын кууһаахтаан
Эриллэ хатыллаат үүннэхпит.

Оботтоох иҥсэрэ саантыыра
Дьиҥинэн олоххо кутталлаах,
Олоотоон суйдуура үөскүүрэ
Дьэбирин аһыммат куталаах.

Бу нэлиэн сахабыт дойдутун
Бэлэхтии таҥарам алҕаабыт,
Барҕалаах оҥорон барытын
Биһиэхэ айхаллыы анаабыт.

Домм!Домм!Домм!

25.04.2025с

Эппэтэх ыраҕын толордум

10 оҕо күн күбэй ийэтигэр Мария Михайловна Жирковаҕа

Мин аҕам сэриигэ барбыта,
Үүт тураан олоҕо үрэллэн,
Кэргэнин бэрт намчы санныгар
Кыракый кыысчаанын хаалларан.

Эргиллиэм диэн бигэ эрэллээх
Алааһын одуулаан турбута,
Санааны түһэрэр сатаммат,
Өстөөҕү кыайыахпыт диэбитэ.

Аҕабын өйдөөбөт эбиппин,
Өлбөөркөй хаартыска уоскутар.
Сэрииттэн биир сурук кэлбэтэх,
Тыыннаах диэн эрэли ииппэтэх.

Сураҕа суох сүппүт саллааттар…
Амырыын! Сүрэҕим кымаахтыыр.
Оо, аҕаа , эн көмүс уҥуоҕун
Ханнатын билбэтим абалаах!

Сааһыран олорон саныыбын,
Ол кэми оҥорон көрөбүн,
Арахсар ыарахан түгэҥҥэр
Туох санаа эйигин тууйбутун.

Санаабыт саргылаах чиҥ санааҥ
Төрөөбүт дойдугар буолуохтаах,
Күн көмүс кыысчаанын туһугар
Эн сэрии үөһүгэр киирдэҕиҥ.

Сиэмэх суор сидьиҥэ ситтэҕэ,
Биир кэрэ олоҕу сиэтэҕэ,
Сырдык тыын ыар толук буоллаҕа,
Эдэркээн эр сурэх өстөҕө.

Бүүс бүтүн бэйэбин ытыйар
Ол сэрии кырыктаах силлиэтэ,
Бу устар олоҕум устата
Сүтүгүм — мин аҕам таптала.

Билэриҥ буоллар дуу, аҕаккаам,
Эн кыыһын Маайыскаҥ дьылҕатын,
Уон оҕо иһирэх ийэтэ
Хос эбээ үөрүүтүн билбитин.

Биэс уолу, биэс кыыһы төрөтөн
Удьуоргун тэниппит эбитин,
Олоҕуҥ салҕанар утумун
Бу сиргэ тустээбит бэйэтин.

Саргылаах санааҕын салҕаатым,
Силистээх олоххун ситэрдим,
Эппэтэх ыраҕын толордум,
Алааскар сибэкки үүннэрдим.

Эн төлкөҥ кэскилин ситимэ,
Олоҕуҥ уостубат уйгута
Ымыылаах кэнчээри ыччатыҥ
Эн ааккын өрүүтүн ахтыаҕа.

Хоһоон автора — Александра Николаевна Жиркова — Дьүөрэл. Уус Алдан улууһа, Бэйдиҥэ бөһүөлэгэ.

Барбыта сэриигэ

Барбыта сэриигэ саха дьон
Түөрт уон биир — түөрт уон биэс сылларга,
Нууччалыы өйдөөбөт да буоллар
Турбута биир кэккэ кирбиигэ.

Айылҕа оҕото билэрэ
Күөх халлаан сабыылаах буор сирин,
Ирбэт тоҥ сириттэн тирэнэн,
Олорор олоҕун ыллыгын.

Көмүскэл буолбута киниэхэ —
Төбөтүн толкуйа, тулуура,
Бултааһын хардыытын билэрэ,
Сиэр — туомун тутуһан сылдьара.

Билбитэ сэрииһит саханы —
Ытара бэргэнин, мындырын,
Оборчо уобуулаах да сиртэн
Омоону булларан тахсарын.

Убаастыыр харыстыыр буолтара
Муударай сэрииһит саханы,
Билиитин көрдөрөн кэлбитэ
Уһуутуур уоттаах сэрииттэн.

Кинилэр сылдьыбыт суолларын
Дууһалыын долгуйан көрөбүн,
Төһөлөөх кэм аастар даҕаны
Ньүөлүйэ ытырар сүрэҕим.

Ол сэрии охторбут дьонугар —
Барыгыт, барыгыт аатыгар
Үйэттэн үйэҕэ махталбыт
Тиийдин дуу, баҕардар, истиэххит.

Санааҥ дуу төһөлөөх дьоннорбут
Тыыннарын толук биэртэрин,
Кэлээччи кэнчээри ыччакка
Саргылаах олоҕу бэлэхтээн.

Кыайыыбыт былааҕа тэлимнии,
Сүүһүнэн сыллары нөҥүөлүү
Уйгулаах халлааммыт анныгар
Сайдыыга, Эйэҕэ Эн сирдээ!

Екия 05.2016
Дьокуускай

СЭРИИ ОҔОЛОРО БАРАХСАТТАР

80-90 саастаахтар
Нүксүччү туттаҥҥыт сылдьаҕыт,
Кыракый санныгыт самныбыт,
Кэхтибит дьүһүҥҥүт-бодоҕут .

Бу бааргыт,сэрии оҕолоро,
Ордон хаалбыт тобохторо,
Ыарахан кэм ыччаттара,
Илэ тыыннаах туоһулара.

Биирдэ тото аһаабакка,
Бүтүн таҥаһы таҥныбакка,
Сылаастык утуйан турбакка,
Ыраас дьиэни билбэккэ.

Оскуолаҕа үөрэнэн,
Аччык кэми аһарбыккыт,
Симик илиэйкэ уотугар
Учуутал хаһыат ааҕара.

Улахан дьоннуун тэҥҥэ
Утуйары да умнан,
Ыарахан түбүк кэмҥэ
Үлэлииргит турунан.

Күүтэрэ сэрии оҕото
Сэрии хаһан бүтэрин,
Кыайыы кыһыл былааҕа
Салгыҥҥа тэлимниэҕин .

Кыайыы чиэһин туһугар,
Сэрии оҕото симэн,
Кыайыы 80 сылыгар
Парадтыаҕыҥ кэккэлээн.

Александра Гуляева,Орто Халыма

Эһэм саныыр сэриини..

Аҕа Дойду сэриитин
Ааспыт, бэтэрээн эһэм,
Кыайыы күнүгэр чуумпуран,
Курутуйан олороро…
Сүһүөҕүнэн бөлтөйбүт,
Тарбахтарын имэринэн,
Кэпсээн-ипсээн, үгүс сэһэн,
Бу күннэргэ тохтуура…

Саныыр кини тохсус маайга
Сэрии уоттаах күннэрин,
Өлүү,сүтүү,аймалҕан,
Фашист кимэр кэмнэрин.
Бүлүмүөтчүк диэн ааттаах
Саллаат буолбут түгэнин,
Буулдьанан силлиэ-ардах
Субулла ытылларын…

Саныыр, үгүс табаарыһа
Ол хонууга хаалбытын,
Ыра буолбут санаалара
Хаһан даҕаны туолбатын…
Снаряд эстэр чыпчылҕаҥҥа
Окуопаҕа сыппытын,
Хоту Дойду ахтылҕана
Сүрэҕин ытырбытын…

Саныыр Дьоппуон сэриитигэр
Кыайыыны уһансыбытын,
Маньчжурия хайатыгар
Өстөөҕү кыдыйбытын…
Кыайыы өрөгөй күнүн
Харах уулаах көрсүбүтүн,
Үөрүү-көтүү үктэллээх
Алааһыгар төннүбүтүн…

Эһэм саныыр сэриини…
Таҥараҕа үҥэр…
Хаһан да хатыламматын,
Хараҕар хаалбыт үлүгэр…

Светлана Андреева-
Маайа Сиэнэ
Дьокуускай куорат
89132712295