Сэтинньи 5 күнүгэр Өктөм нэһилиэгэр сомоҕолоһуу күнүгэр анал байыаннай дьайыыга сылдьар биир дойдулаах байыастарбытыгар аналлаах аһымал кэнсиэр буолла.
Бу кэнсиэргэ нэһилиэкпит, сэргэстэһэ сытар Төхтүр нэһилиэгин талааннаах ырыаһыттара, «Сардаҥа» түмсүү далбар хотуттара, Покровскайдааҕы искусство оскуолатын, Өктөмнөөҕү тыйаатыр оскуолатын уһуйааччылара, АГАТУ Өктөмнөөҕү салаатын устудьуоннара кытыннылар. Ол курдук, 2015 сыллааҕы “Эн сулускун” телевизионнай, 2019 сыллаахха өрөспүүбүлэтээҕи “Туой Хайа” күрэхтэр муҥутуур кыайыылааҕа, бүтүн Арассыыйатааҕы устудьуоннар бэстибээллэрин лауреата Иоганн Матвеев, «Саха Өрөспүүбүлүкэтин бочуоттаах тутааччыта» бэлиэ туһааннааҕа, ырыа куттаах Владимир Прокопьев, Христофор Максимов аатыгар ыытыллыбыт бүтүн өрөспүүбүлүкэтээҕи дэгэрэҥ ырыа күрэҕин Чыпчаал бирииһин хаһаайына Николай Макаров, айар талааннаах самодеятельнай мелодист Степан Андреев ылбаҕай ырыаларынан дьону сэргэхситтилэр.
Кэнсиэр олус интириэһинэй буолла, чабырҕахтан саҕалаан классическай музыкаҕа тиийэ иһиттибит. Өктөм нэһилиэгин биир тарбахха баттанар «Сардаҥа» түмсүүтэ (салайааччы Федорова А.П.) чабырҕахтаан чаҕаарда, «Морячка» үҥкүүнү толорон дьону сөхтөрдө. Ыалдьыттарбыт Покровскай куораттан оҕо искусствотын уһуйааччылара Дарья Филимонова ырыата, саксофоҥҥа Владлена Максимова толоруута дохсун ытыс тыаһынан доҕуһуолланна. Өктөм оҕо тыйаатырын уһуйааччылара Руслан Васильев скрипкаҕа Карл Дженкинс «Палладио», Ньургустан Захаров гитараҕа Роланд Диенс «Танго» айымньыларын киһи барыта умсугуйан иһиттэ. Арктикатааҕы государственнай агротехнологическай университет Өктөмнөөҕү салаатын устудьуоннара эҕэрдэ үҥкүүлэрин, Никита Чириков, Геннадий Соломонов ырыаларын дьон куруутун кэтэһэр.
Бу тэрээһиҥҥэ «Сардаҥа» түмсүү тэрийиитинэн эрдэттэн мустан нэһилиэк дьоно 10 маскировка-сетка оҥорон бу киэһэ туттардылар.
Маннык аһымал кэнсиэрдэр дьону биир тыыҥҥа киллэрэн, сомоҕолуур күүстээхтэр.
Федора Фомина
